|
|
No Censorship! |
| ||||||
| ||||||||
خبری، تحليلی و انتقادی
كه د افغانستان اوسني حالت ته په دقيقه توګه ځير شو ، دې پايلي ته رسيږو چې تر هرڅه د مخه بايد په هيواد كې د امنيت له پلوه كړكيچن حالت اواره شي. تاسو ګواه ياستئ هره ورځ د هيواد له ګوټ ګوټ څخه داسي رپوټونه خپريږي چې ،په پلاني ولايت كې امنيتې سرتيرې ووژل شول، په پلاني ولايت كې امنيتي ځواكونو طالبان ووژل او يا هم ددي پيښو وروستۍ بيلګه په لغمان كې، په يوښونځى باندې وسلوالو طالبانو بريد ښه بيلګه ګرځيدلاي چې په ترڅ كې شپږ تنه زده كوونكې ووژل شول او څه د پاڅه پنځلس تنه نور ټپيان شول . دغه راز د ملګرو ملتونو سرمنشي دا پيښې بوږنونكې وباله او زياته كړه چې،ددې پيښې عاملين بايد ونيول شي او د قانون منګلو ته وسپارل شي. د دې ټكې په پام كې نيولو سره جوتيږي چې دامنيت نشتوالي، د خلكو ترمنځ ويره رامنځ ته كړيده ځكه ، په هيواد كې د لسګونو او زرګونو امنيتي كورني او بهرني سرتيرو په شتون سره سره بيا هم، وسلوال طالبان كولاي شي چې ملكي او دولتي تاسيسات په نښه كړي او د سولې د بهير په وړاندي خنډ جوړكړي. له بلي خوا پرون په نوى ډيلي كې، ولسمشر كرزي له خپل ملګري پلاوي سره چې د هغوي په ډله كې د كابيني وزيران ،د ولسي جرګي ځينې وكيلان او د سوداګرو په گډون ځينې خبريالان هم شامل دي د افغانانو فرهنګي او هنري جشنوارې پرانسته اوهغه موخه يي په افغانستان كې د سيلانيانو او پانګوالو راجذبول وښوده. په يوه داسي هيواد كې چې له څو پلوه تر امنيتي ګواښ لاندې دى ، دا پوښتنه رامنځته كيږي چې د بهرنيو سيلانيانو دراجذبولو او د پانګوالو د هڅولو هڅې څه ګټۀ لري؟ آيا دوي د ولسمشر په دې خبرو چې هغوي ته اداري آسانتياوي برابر يږي او امنيت يي نيول كيږي باور كوي؟. هندوستان ته د ولسمشر كرزى سفر ،د اقتصادي پراختيا او د دواړو هيوادونو ترمنځ د ښو اړيكو په برخه كې گټه وردى خو زما په آند ولسمشر بايد په دې سفر كې ،زياته هڅه وكړي ترڅو په سيمه كې د امنيت په راټينګولو كې د پام وړ خبري اتري وكړي .ځكه په داسي حال كې چې ولسمشر پانګوال په افغانستان كې پانګونې ته هڅوي په نړيواله كچه داسي رپوټونه خپريږي چې په بهر كې د بهرنيو پانګوالو او سيلانيانو په ذهنونو كې له افغانستان څخه د تاوتريخوالي او خونړيو پيښو انځور تر سترګو كيږي. اوس چې نړيوالې ټولنې له افغانستان سره د بيارغاونې په برخه كې،د هر اړخيزو مرستو ژمنه كړيده،ټولې هڅې بايد د امنيت په راټينګولو كې تر سره شي. لكه څنګه چې په افغانستان كې د ملګرو ملتونو هريو ځانګړى استازى په افغانستان كې د امنيت په راوستلو كې ټينګار كړى دى، خو بيا هم په ملي پوځ او پوليسو كې ماشومان تر سترګوكيږي چې دوي له خپل كور څخه بهر د خپل ځان دفاع نشي كولاي نو له وطن او سولي څخه به دوي څنګه دفاع كوي؟ وموليدل چې د افغانستان دملي پوځ څخه پوه او تكړه افسران تنقيص شول او دم ګړۍ په واټونو كې يا لاسي شيان پلوري او يا بى روزګاره ګرځي او د هغوي پرځاي زياتره ماشومان جذب كيږي چې زما په نظر دا د دولت يوه ستره تيروتنه ده ،ځكه د ملي پوځ او پوليسو له كتار څخه د تكړه او پوه كسانو شړل ددې لامل ګرځيدلي ترڅو په هيواد كې د سولي بهير له خنډ سره مخ شي او د دولت مخالفان او دښمنان قوت پيدا كړي. زمونږ هيواد وال د رسنيو له لارې ښايي ليدلې وې، زياتره هغه كسان چې د طالب په نومونو له دولت سره يو ځاي كيږي او يا د امنيتي ځواكونو لخوا په كليو او بانډو كې نيول كيږي عمرونه يي په اټكليزه توګه له نهه ويشتو نه پورته دي . | ||||||||
