مشرف در گرداب انتحار

اتم فصل - ممنوعه خپرونې
يودېرشمه ماده:
په ټوليزو رسنيو كې د دغه ډول ليكنو خپرول جواز نه لري:
1- هغه ليكنې چې د اسلام د اصولو مغاير او نورو دينونو او مذهبونو ته سپكاوى وي.
2- هغـه ليكنې چې د اشخاصو د سپكاوي او پر هغو باندې د افتراء لامل شي.
نهم فصل - جزايي حكمونه
دوه دېرشمه ماده:
دامتياز خاوند په هغه صورت كې مسوْول ګڼل كېږي چې د دې قانون د حكمونو مخالف عمل وكړي.
دري دېرشمه ماده:
(1) هغه رښتيني او حكمي كسان چې د دې قانون د حكمونو په پام كې نيولو پرته د افغانستان په قلمرو كې د ټوليزو رسنيو په تاْسيسولو او چلولو لاس پورې كړي، په نقدي جزاء محكومېږي.
(2) كه چېرې د ټوليزو رسنيو موْسس او چلوونكى رښتينى شخص وي، په لاندې توګه په نقدي جزاء محكومېږي:
 ټلويزيون پنځلس زره افغانۍ.
 راډيو لس زره افغانۍ.
 آژانس لس زره افغانۍ.
 كېبلي شبكه دېرش زره افغانۍ.
(3) كه چېرې د ټوليزو رسنيو موْسس او چلوونكى حكمي كس وي، په لاندې توګه په نقدي جزاء محكومېږي:
 ټلويزيون اوولس زره افغانۍ.
 راډيو دوولس زره افغانۍ.
 كېبلي شبكه څلور دېرش زره افغانۍ.
 آژانس دوولس زره افغانۍ.
څلوردېرشمه ماده:
(1) مسوول مدير كولای شي د اثر د خاوند د نوم له څرګندولو څخه ډډه وكړي. په دې صورت كې د اثر له خپرېدو څخه پيدا شوی مسووليت، مسوول مدير ته متوجه دی.
(2) په موقوتو خپرونو كې د ليكوال په مستعار نوم انتقادي ليكنې خپرېدی شي، په دې شرط چې د ليكوال نوم او هويت مسوول مدير ته څرګند وي، د ليكنې يا اثر له خپرېدو څخه پيدا شوی مسووليت مسوول مدير ته متوجه كېږي.
پنځه دېرشمه ماده:
(1) كه چېرې د اثر خاوند د دې قانون له حكمونو سره سم د جزاء وړ ګڼل شوی وي، د جرم د فاعل په توګه تر عدلي څارنې لاندې نيول كېږي، په دې حالت كې مسوول مدير د جرم د شريك په توګه ګڼل كېږي.
(2)كه چېرې د ليكنې خاوند معلوم نه وي، له خپرېدو څخه يې پيدا شوی مسووليت، يوازې مسوْول مدير ته متوجه دی.
شپږدېرشمه ماده:
كه چېرې ليكوال په نقدي جريمه محكوم شي، مكلف دی، د جريمې د حكم د صادرېدو له نېټې څخه د يوې مياشتې په موده كې محكوم بها د دې قانون له حكمونو سره سم تحويل كړي.
لسم فصل - وروستني حكمونه
اووه دېرشمه ماده :
بهرني اتباع كولای شي د سينماټوګرافۍ فلمونه په هېواد كې جوړ كړي، په دې شرط چې له مخكې يې د اطلاعاتو او كلتور وزارت اجازه ترلاسه كړې وي.
اته دېرشمه ماده:
د ټوليزو رسنيو فعاليت د هغې اساسنامې په وسيله سمبالېږي، چې موخې، دندې، واكونه، تشكيل او اړوندې مالي چارې په كې شاملې وي.
نهه دېرشمه ماده:
د اطلاعاتو او كلتور وزارت اړ دی، د كورنيو او بهرنيو ټوليزو رسنيو د خپرونو د آزاد فعاليت د تحقق په منظور ممكنې آسانتياوې برابرې كړي.
څلوېښتمه ماده :
د هغو ټوليزو رسنيو د امتياز خاوند او مسوْول چلوونكى چې د دې قانون تر ټينګښت دمخه يې په فعاليت پيل كړی وي، مكلف دي د هغه د انفاذ له نېټې څخه د دوو مياشتو په موده كې، د دې قانون حكمونه په پام كې ونيسي.
يوڅلوېښتمه ماده:
د ښوونځيو او د لوړو زده كړو، څېړنيزو، او مسلكي موْسسو د درسي او پوهنيزو كتابونو چاپ او خپرول، د دې قانون د حكمونو تابع نه دي.
دوه څلوېښتمه ماده:
(1) په دې قانون كې د خوندي شويو سرغړونو د څېړنې په موخه، په لاندې تشكيل سره د څېړنې كمېسيون جوړېږي:
 د اطلاعاتو او كلتور وزير د رئيس په توګه.
 د افغانستان د علومو اكاډمۍ استازی د غړي په توګه.
 د ژورناليزم د پوهنځي دوه تنه استازي د غړو په توګه.
 د افغانستان د بشر د حقوقو د خپلواك كمېسيون استازی د غړي په توګه.
 د خبريالانو (ژورناليسټانو) د اتحاديې دوه تنه استازي د غړو په توګه .
(2) د دې مادې په لومړۍ فقره كې خوندي شوی كمېسيون د دې قانون له حكمونو څخه درج شوې سرغړونې څېړي.
كه چېري موضوع د عدلي څارنې غوښتنه وكړي، جريان د غور په منظور عدلي سرچينې ته وړاندې كېږي.
دري څلوېښتمه ماده:
دغه قانون د توشېح له نېټې څخه نافذ او په رسمي جريده كې دې خپور شي او په نافذېدو سره يې، د 1380 هجري لمريز كال د كب د مياشتې د (18) مې نېټې د رسمي جريدې په (800) مه ګڼه كې د مطبوعاتو خپور شوى قانون لغوه ګڼل كېږي.