No Censorship!

د افغانستان لوى څارنوال عبدالجبار ثابت وړاندې تر دې چې لوى څارنوال شي د کورنيو چارو وزارت د حقوقي چارو سلاکار او خداى شته په خپل کار کې ډېر بريالى هڅاند او غښتلى وو ،له نوموړې دندې وروسته د لوى څارنوال په توګه ده د خپلو ټاکل کېدو پر مهال د افغانستان په ولسي جرګه کې د خلکو ټاکل شويو استازو ته وويل چې په څارنوالۍ کې ګڼې ستونزې دي او ضرور به يې له منځه وړي دغه راز يې د فساد پر وړاندې هم کلک ټتر وواهه او سوګند يې ياد کړ چې د خداى او خلکو په مرسته به د فساد پر وړاندې خپله مبارزه کوي او نه به پرېږدي چې د کار پر مخ کې يې څوک خنډ شي ، بل لورى نوموړى يوه ورځ د دولت د کابينې اونيزې غونډې ته هم بلل شوى وو او د ولسمشر او ټولې کابينې پر وړاندې يې د فساد سره خپله کلکه مبارزه اعلان کړه ،کرزي ورته وويل چې زه د تر شا ولاړ يم زما له دفتر نه يې شروع کړه خو فساد له منځه يوسه .

د اوږدو څڼو او جګې ونې خاوند جبار ثابت هم د کرزي ددغه قوي ملاتړ سره خپل کار ته مټې را بډ وهلې او په رسنيو کې يې د خپل فعاليت غږ پورته کړ چې  د خلکو په منځ کې يې سترې هيلې پيدا کړې چې ګواګي دا سړى به ددغه غم ځپلي هېواد د ګڼو ستونزو څخه يوه  پيڅکه ټوله او فساد به له منځه يوسي .ښاغلي ثابت په لومړي سر کې د جميعت اسلامي د يوه جګبوړي کس او د اطلاعاتو او کلتور دپخواني وزير صديق چکړي   سره خپلې پنجې ټينګې کړې ثابت وويل چې چکړي د خلکو په شخصي شتمنيو زور زياتى کړى او قانون ته غاړه نه اېږدي بايد ضرور د محکمې مېز ته را کش کړى شي آن تر دې چې لا څو ساعته يې وټاکل چې په دومره ساعتونو کې به ښاغلى چکري څارنوالۍ ته سپارل کېږي .د ثابت د دغه منډو ترړو پايله ډېر زر او بې نتيجې وه او د جګپوړو افغاني چاروکو په گڼو ټلفونونو يې صديق چکري له هر څه خلاص او په څارنوالۍ کې پرته دوسيه يې بيا هم د پخوا په څېر دوړو او ګردو ته واچوله .له نوموړې پېښې به ايله دوې اونۍ تېرې وې چې ښاغلي ثابت د يوې بلې لاسته راوړنې خبر ورکړ او په ملي ټلوېزيون کې يې د څلور سوه زرو امريکايي ډالرو د غلا خبر د رسنيو خولې ته ورکړ ثابت وويل چې د ملي ټلوېزيون په مربوطاتو کې تر څلور سوه زره امريکايي ډالرو زياته غلا شوې او غلا کوونکي به يې زر د قانون منګلولو ته وسپارو ، د ملي ټلوېزيون مشر نجيب روشن چې د ښاغلي سپنتا له خوا کرزي ته د يو ښه او تکړه سړي په څېر ور پېژندل شوى ددغه خبر په خبرېدو يې هر څه له امريکې څخه د کرزي تر بېرته را ستنېدو پورې ځنډولي وو او د څارنوال په ځواب کې يې څه نه ويل د څارنوالۍ د يوه چارواکي په خبره چې نه  غواړي نوم يې خلک وپېژني وايي چې اوس د دويم ځل لپاره په ثابت باندې د ولسمشر کرزي له خوا کلک فشار دى چې پام چې نجيب روشن ته څه ونه وايې دغه راز ګنګوسې دي چې نجيب روشن د کرزي د ورور سره د نېشه يي توکو په کار بار کې هم شريک دى او څه موده د مخه ښاغلى روشن د کابل په نړيوال هوايي ډګر کې د نېشه يي توکو په تور نيول شوى چې بيا د کرزي د ورور په يو ټلفون خوشى شو .لنډه دا چې که ددغه ليکنې په باره کې هر څوک ځواب لري له ماسره د ښکېلو خواوو رښتونې ثبت شوې خبرې شته چې دغه چارواکي په رښتيا په دارنګه وطن ورانۍ کې لاس لري کرزى چې يو محافظه کاره ولسمشر دى په دارنګه پاچاهۍ يې د حکومت مزي په شلېدو دي او ډېره زر ده چې له دغه آزموينې د ناکامو ولسمشرانو په قطار کې ودرېږي ځکه دده څنګ ته ډاړه ماران ټول دي ،ورور يې چې د نېشه يي توکو کاروباري دى دومره نه شي ورته ويلى چې قيوم خانه دا کار د ناروا دى نو په آخر کې مو ښاغلي لوى څارنوال ته وړانديز دادى چې لاړ شه د روژې مبارکه مياشت ده په کوم مسجد کې ملا امام شه دا وطن ته پاک زړى سړى په درد نه دوا کېږي کوم خوب د چې د وطن د هوسايي لپاره ليدلى وو هغه هم نه رښتيا کېږي او په اخرکې د بلې ناکامۍ مبارکي هم درته وايو .